Mae gennym genhadaeth glir a phenodol: sicrhau bod pawb sy’n profi camau gorfodi yn cael eu trin yn deg ac yn cael eu hamddiffyn rhag arfer gwael.

Mae gennym nifer o flaenoriaethau cynnar sy’n allweddol i’n helpu i gyflawni’r genhadaeth hon:

Tystiolaeth

Mae angen dybryd am dystiolaeth gadarn yn y sector hwn, wedi’i chyhoeddi’n llawn a gan gorff annibynnol.

Rydym ar hyn o bryd yn gweithio i ddatblygu’r sylfaen dystiolaeth gadarn hon i lywio ein gwaith, gan sefydlu llinell sylfaen ddibynadwy i roi gwir ymdeimlad o ba mor aml y mae materion yn codi yn y broses orfodi a, phan fyddant, o’r hyn sy’n digwydd.

Rydym hefyd yn cyflwyno ffurflenni data chwarterol gan y diwydiant i'n helpu i nodi tueddiadau ac i lywio ein gwaith goruchwylio a monitro ein hunain.

Cwmpas ac Achredu

Byddwn yn goruchwylio cymaint o waith â phosibl o dan Reoliadau Cymryd Rheolaeth o Nwyddau. Bydd hyn yn cynnwys y diwydiant gorfodi sifil, gorfodi'r uchel lys a thimau gorfodi mewnol mewn Awdurdodau Lleol.

Agorodd ein cynllun achredu ar gyfer ceisiadau ar 18 Medi. Drwy ein fframwaith achredu y byddwn yn arfer ein harolygiaeth yn ymarferol, er mwyn creu atebolrwydd ystyrlon.

Bydd y cynllun yn rhoi cyfle i gwmnïau gorfodi wneud ymrwymiad cyhoeddus i atebolrwydd a safonau uchel. A bydd hefyd yn helpu credydwyr i hybu arfer da drwy sicrhau eu bod ond yn contractio â chwmnïau achrededig sydd wedi gwneud ymrwymiad gweithredol i arolygiaeth yr ECB.

Safonau

Rydym yn datblygu safonau newydd ar gyfer gwaith yn y sector gorfodi, er mwyn sefydlu’n gliriach a mwy cynhwysfawr yr hyn y dylid ei ddisgwyl gan gwmnïau gorfodi ac asiantau gorfodi.

Bydd hyn yn cynnwys ystyried materion pwysig megis bregusrwydd a fforddiadwyedd.

Wrth ddatblygu'r safonau hyn, byddwn yn ymgysylltu ac yn ymgynghori'n eang.