Cwynion

Ein swyddogaeth gwyno

Yn ogystal â gwella'r ffordd y mae cwmnïau'n ymdrin â chwynion a chreu cysondeb ar draws y sector, byddwn hefyd yn sefydlu ein gwasanaeth ymdrin â chwynion ein hunain. Bydd ein swyddogaeth gwyno yn derbyn unrhyw gŵyn newydd am ymddygiad asiant gorfodi neu gwmni lle mae person yn teimlo nad yw ei gŵyn gychwynnol i'r cwmni dan sylw wedi cael ei thrin yn deg neu mewn modd amserol. Bydd y gwasanaeth hwn yn lansio ym mis Ionawr 2025. Bydd canllawiau pellach ar sut i gwyno yn cael eu cyhoeddi yn nes at yr amser.

Ni fyddwn yn gallu penderfynu ar gwynion am y ddyled ei hun (e.e. dilysrwydd gwarant neu writ), y ffioedd a godir ar ddyled neu os yw achos wedi cychwyn gweithrediadau cyfreithiol.

Byddwn yn gwneud penderfyniadau am ganlyniad cwynion ar sail a yw'r asiant neu'r cwmni wedi gweithredu yn unol â'n safonau. Lle byddwn yn canfod bod asiantau a/neu gwmnïau wedi torri ein safonau byddwn yn argymell iawn priodol i'r sawl sy'n cwyno. Bydd gweithredu ein hargymhellion ar wneud iawn yn ofyniad gorfodol ar gyfer achredu busnesau gorfodi.

Bydd hon yn system a dull newydd o ymdrin â chwynion ac rydym am sicrhau bod ein holl benderfyniadau yn seiliedig ar dystiolaeth. Am y rheswm hwn, nid ydym yn credu y bydd yn bosibl i ni asesu cwynion hanesyddol yn ddibynadwy (sy'n codi cyn i'n cynllun newydd ddod yn weithredol) lle rydym yn annhebygol o allu cael gafael ar dystiolaeth fel fideo camera corff neu ddogfennau perthnasol. Rydym yn cydnabod y bydd hyn yn siomedig i rai ond rydym yn canolbwyntio ar sicrhau, o ddyfodiad ein cynllun, y bydd pawb sydd â chwyn yn cael mynediad at gynllun cwynion annibynnol.